Tidsreiser og mystiske teikn

Steinar Høiback: Gutenbergs hemmelighet
Aschehoug, 2009

Viss du er på leit etter enkel action eller kvardagslege problemstillingar, skal du ikkje lesa denne boka.
Har du derimot sansen for viderverdige historiske koplingar, tolking av mystiske symbol og reiser på tvers av tid og rom, er dette boka for deg. For her vekslar det mellom Jerusalem i år 1111, Mainz 1468 og Akershus slott 2011.

Altså - ein slags mellomting mellom Sofies verden og Da Vinci-koden.

På geburtsdagen sin får Sophus ein spesiell gave: ei bok laga av ingen ringare enn Johann G. Gutenberg i 1445. Det viser seg at Sophus er utvald som utsending på ei svært uvanleg skattejakt. Oppdraget er å finna forklaring på ein myte som går tilbake til Bibliotecha Alexandria i 280 f.Kr. Myten fortel om ein skatt som kan gi svar på den størsta gåta i historia, ei gåte som heile menneskeheita er del i.

Dermed vert Sofhus kasta ut på ei heseblesande reise med stopp ved store hendingar i europeisk kulturhistorie med forgreiningar til både egyptiske faraoar og greske gudar.

Ifølge forlaget rettar boka seg mot gutar. Det må i så fall vera ein gute-type, og alle andre, som elskar å fordjupa seg i "eksotiske" og innfløkte saker og ting. For dei kan boka vera eit funn. Boka krev ein habil lesar, men den som vågar seg ut på ferda, kan koma derifrå med stor kunnskap i vår kulturelle arv. Med andre ord: ei stor, men hektisk danningsreise.


Aud Søyland Kristensen,
Time bibliotek